Business Engineering Journal

ძვირფასო მკითხველო!

ბიზნეს-ინჟინერინგი (Business-engineering) ბიზნეს-სისტემების განვითარების თანამედროვე ტექნოლოგიაა, რომელიც საინჟინრო მიდგომებს ემყარება და დღევანდელობის ყველაზე აქტუალური პრობლემების გადაჭრას ემსახურება. ღრმად ვარ დარწმუნებული, რომ საქართველოში მოქმედ ფირმებსა და კომპანიებს ბიზნეს-ინჟინერინგის დანერგვა უდიდეს სარგებლობას მოუტანს. ბიზნეს-ინჟინერინგის უნივერსიტეტები წარმატებით ფუნქციონირებენ გერმანიაში, შვედეთში, ნიდერლანდებში, ტაილანდსა და სხვა ქვეყნებში. განსაკუთრებული პოპულარობით სარგებლობს მათი საბაკალავრო, სამაგისტრო და სადოქტორო პროგრამები. საქართველოს ტექნიკურ უნივერსიტეტშიც დაფუძნდა ბიზნეს-ინჟინერინგის ფაკულტეტი, რომელიც შემდგომში შესაბამისი კვალიფიკაციის სპეციალისტებს მოამზადებს. ბიზნეს-ინჟინერინგი ინტერდისციპლინარული მეცნიერებაა, რომელიც ხელს უწყობს მეტად აქტუალური თანამედროვე პრობლემების გადაწყვეტას ეკონომიკაში, ინჟინერიაში, ინფორმაციული ტექნოლოგიების სფეროში, აერონავტიკაში, ბიომედიცინასა და სხვა დარგებში.

ჟურნალი „ბიზნეს-ინჟინერინგი“ ყოველმხრივ შეეცდება მოწინავე მეცნიერული კვლევების შედეგების გაშუქებასა და მათი პრაქტიკაში დანერგვის ხელშეწყობას. მის რუბრიკებში ასახული იქნება: ბიზნესის განვითარების მიზნები და მიმართულებები, ბიზნეს-პროცესების მართვის უახლესი ტექნოლოგიები, ტექნოპარკების მოწყობის პრინციპები, საინჟინრო-საკონსულტაციო და სამართლებრივ-საექსპერტო შეფასებები, წარმოების პროცესების მომზადებასთან დაკავშირებული საქმიანობა, სიახლეები ინოვაციების და ინვესტიციების სფეროში.

ჟურნალში გაანალიზდება ბიზნეს-ინჟინერინგის ეკონომიკური, ეკოლოგიური, სამართლებრივი და სოციალური შედეგები. ვიმედოვნებთ, იგი დასახულ მიზნებს წარმატებით შეასრულებს.

ალექსანდრე სიჭინავა

მთავარი რედაქტორი, სრული პროფესორი